Прывітальнае слова Пастаяннага каардынатара ААН у Беларусі Iанны Казана-Вішнявецкі

Глабальная тэма кампаніі Сусветнага дня барацьбы са СНІДам 2022 года - ЧАС ДЛЯ РОЎНАСЦІ! - з'яўляецца заклікам да ўсіх нас, ва ўсіх краінах свету, зрабіць практычныя захады, неабходныя для знішчэння няроўнасці, а таксама ўнесці свой уклад дзеля перамогі над СНІДам да 2030 года.

У нашым рэгіёне праблема няроўнасці застаецца актуальнай, асабліва калі размова ідзе пра ключавыя групы насельніцтва з пункту гледжання ВІЧ/СНІД, гэта, апроч іншых, мужчыны якія практыкуюць секс з мужчынамі, трансгендарныя людзі, людзі, якія ўжываюць наркотыкі, секс-працаўнікі і зняволеныя, гэта значыць усе непрапарцыянальна закранутыя ВІЧ.

Толькі трэць людзей з ключавых груп маюць рэгулярны доступ да прафілактыкі і многія з іх сутыкаюцца з сур'ёзнымі прававымі бар'ерамі, у тым ліку з крыміналізацыяй, дыскрымінацыяй і стыгматызацыяй.

Без эфектыўнай працы з ключавымі групамі мы не зможам дабіцца поспеху ў барацьбе з эпідэміяй ВІЧ.

У дадатак да цяжкасцей у сувязі з эпідэміяй ВІЧ у краіне, сур'ёзны ўплыў на прыняцце агульнадзяржаўных і агульнасацыяльных мер у адказ на ВІЧ і ў цэлым на ажыццяўленне палітыкі ў дачыненні да ВІЧ у Беларусі аказваюць знешнія фактары, такія як палітычны, эканамічны крызіс і крызіс у галіне аховы здароўя ў рэгіёне і ва ўсім свеце.

Міграцыйныя працэсы на межах Беларусі і ўнутры краіны ствараюць праблемы, якія ўплываюць на своечасовасць і эфектыўнасць кіравання міграцыяй. Гэтыя праблемы неабходна вырашаць хутка, улічваючы тое, што міграцыя з'яўляецца агульнапрызнанай і значнай сацыяльнай дэтэрмінантай здароўя.

На працягу многіх гадоў Беларусь з'яўляецца адным з лідараў рэгіёна ва ўкараненні навукова-абгрунтаваных рэкамендацый СААЗ, уключаючы палітыку "Лячыць усіх", саматэсціраванне на ВІЧ, праграмы зніжэння шкоды (у тым ліку опіоідную замяшчальную тэрапію і праграму абмену іголак).

У мінулым годзе ў Беларусі паспяхова стартаваў праект укаранення ДКП (дакантактнай прафілактыкі). Надзвычайна важна не толькі працягваць гэтыя меры, але і пашыраць іх ахоп, каб яны аказвалі больш істотны ўплыў на эпідэмію ВІЧ у краіне.

Праблемы, якія ўзнікаюць у сувязі з ВІЧ, неабходна вырашаць з дапамогай патэнцыялу і рэсурсаў устаноў ААН.

У Беларусі Аб'яднаная каманда ААН па ВІЧ/СНІДу і ўсе яе члены - ЮНЭЙДЗ, СААЗ, ЮНІСЕФ, ЮНФПА, УНЗ ААН, ПРААН, УВКБ ААН і іншыя - заўсёды былі і застануцца надзейнымі партнёрамі дзяржаўных і няўрадавых арганізацый дзеля максімальнай падтрымкі нацыянальных намаганняў у барацьбе з эпідэміяй ВІЧ.

Толькі на працягу апошняга года, агенцтвы сістэмы ААН падтрымалі рэалізацыю гранта Глабальнага фонду ў Беларусі, у тым ліку рэалізавалі закупку АРВ-прэпаратаў і тэстаў; a таксама прэзентавалі ацэнку нацыянальнай наркапалітыкі Беларусі з канкрэтнымі рэкамендацыямі і ацэнку прававога асяроддзя ў кантэксце ВІЧ.

Мы правялі навучанне і павышэнне кваліфікацыі медыцынскіх работнікаў, прадстаўнікоў грамадзянскай супольнасці і суполак, МУС і сацыяльных работнікаў. Прыкладам доказнага і навуковага падыходу да прынцыпу ЮНЭЙДС «Ведай сваю эпідэмію» з'яўляецца агульнанацыянальнае колькаснае і якаснае даследаванне здароўя мігрантаў, у тым ліку іх рызыкі і ўразлівасці да ВІЧ, якое праводзіцца МАМ.

Адным з найважнейшых дасягненняў Беларусі ў сферы супрацьдзеяння ВІЧ-інфекцыі стала атрыманне ў 2016 годзе прэстыжнага сертыфіката СААЗ аб ліквідацыі перадачы ВІЧ і сіфілісу ад маці дзіцяці. Беларусь стала адной з першых і пакуль яшчэ нямногіх краін свету, якія гэтага дабіліся.

У той жа час, неабходныя намаганні для таго, каб падтрымаць усе дасягненні апошніх 30 гадоў развіцця.

Каб захаваць статус зацверджаны СААЗ, неабходна выканаць адну з рэкамендацый Глабальнага камітэта па валідацыі - адмяніць артыкулы 157 і 158 Крымінальнага кодэкса аб пастаўленні ў небяспеку заражэння і аб перадачы ВІЧ і ІППШ.

Думаю, усе мы згодныя з тым, што надышоў час прывесці прававое поле ў адпаведнасць з сучасным станам праблемы ВІЧ-інфекцыі і дасягненнямі сучаснай навукі і медыцыны, якія адлюстроўваюць эвалюцыю ВІЧ-інфекцыі ад некалі смяротнага захворвання да хранічнага, якое магчыма кантраляваць.

Адмена артыкулаў 157 і 158 Крымінальнага кодэкса сцвердзіць імкненне краіны да падыходу без дыскрымінацыі і да захоўвання правоў кожнага пацыента.

У гэты дзень я заклікаю ўсіх нашых партнёраў працягваць працу на карысць Беларусі, дзе людзі з ВІЧ не застануцца без увагі.

Кожны з нас можа зрабіць свой унёсак,  калі падтрымае ЧАС ДЛЯ РОЎНАСЦІ!